Беларускія мытнікі спынілі ўвоз на тэрыторыю Еўразійскага эканамічнага саюза чарговай буйной партыі псіхатропных сродкаў: 182 кг псіхатропаў мелі намер перамясціць праз беларуска-польскую мяжу, схаваўшы іх у прамысловым вентылятары.

Грузавік MAN ішоў з Сербіі праз пункт пропуску «Казловічы». 42-гадовы грамадзянін Сербіі, кіроўца аўтацягніка, падаў да мытнага афармлення дакументы на ўвоз партыі прамысловага абсталявання. 

Брэсцкія мытнікі ва ўзаемадзеянні з памежнікамі прынялі рашэнне аб накірунку грузавіка на агляд з выкарыстаннем інспекцыйна-надгляднага комплексу. Вынікі атрыманай сканаграмы сведчылі аб наяўнасці ў грузавым адсеку даўкладанняў, што пацвердзіў і далейшы мытны дагляд.

Як вынік, з перамяшчанага прамысловага вентылятара вынята 89 палімерных пакетаў з таблеткамі і парашком, а таксама два палімерных мяшка з рэчывам светла-карычневага колеру. Службовы сабака сваёй рэакцыяй паказаў на магчымую наяўнасць у іх забароненых рэчываў.

Згодна з заключэннем эксперта ўпраўлення Дзяржаўнага камітэта судовых экспертыз па Брэсцкай вобласці, прадстаўленыя на даследаванне прадметы з'яўляюцца асабліва небяспечнымі псіхатропнымі рэчывамі трох відаў: МДМА, амфетамін і метамфетамін.

Агульная вага псіхатропаў амфетамінавага шэрагу, якія выклікаюць псіхічную залежнасць, складае амаль 182 кг: такой колькасці псіхатропаў хапіла б больш чым на 600 тысяч доз. А агульны кошт на чорным рынку дасягае больш за 3,5 млн даляраў ЗША.

У дачыненні да грамадзяніна Сербіі, які дзейнічаў па папярэдняй змове ў групе асоб, прыменена мера стрымання ў выглядзе заключэння пад варту.

Брэсцкай мытняй распачата крымінальная справа ў адпаведнасці з ч. 2 арт. 328-1 (незаконнае перамяшчэнне праз мытную мяжу наркатычных сродкаў, псіхатропных рэчываў або іх прэкурсораў або аналагаў). Санкцыяй дадзенага артыкула прадугледжана пазбаўленне волі на тэрмін да 10 гадоў.

Мытнымі органамі ва ўзаемадзеянні з наркакантролем МУС праводзяцца далейшыя аператыўныя і іншыя мерапрыемствы.

Па матэрыялах Брэсцкай мытні